Féile na hInse: Stair agus Forbairt
Bunaíodh Féile na hInse i 1984 mar chuid den cheiliúradh ar bhua na hInse i gcomórtas Ghlór na nGael do 1983.
Bronnadh an duais i mí Aibreáin 1984, agus bheartaigh an coiste eagraithe féile bheag Ghaeilge a reáchtáil chun íomhá na Gaeilge sa bhaile a neartú. Eagraíodh cúig nó sé chomórtas i gCois na hAbhna ar an Satharn, thar thréimhse ceithre huaire an chloig, agus tharla an bronnadh oifigiúil an Domhnach dar gcionn.
Ón tús beag sin, tá fás agus forbairt tagtha ar an bhféile. Le tacaíocht na scoileanna, na múinteoirí, na dtuismitheoirí agus an phobail, tugann sí deis do dhaoine óga a gcuid Gaeilge a úsáid taobh amuigh den seomra ranga agus a gcuid buanna a léiriú os comhair lucht féachana.
An Chéad Choiste, 1984
-
Cathaoirleach: Roibeárd Ó Ceallaigh
-
Rúnaí: Pádraig Mac Mathúna
-
Rúnaí na gComórtas: Dónall Mac Mathúna
-
Cisteoir: Máirtín Ó Dubháin
-
Oifigeach Poiblíochta: Domhnall Ó Loingsigh
Féile na hInse 2027
Beidh Féile na hInse 2027 ar siúl ón 24 Feabhra go dtí an 7 Márta, le clár leathan comórtas agus imeachtaí do dhaltaí bunscoile agus iar-bhunscoile.
Beidh imeachtaí ar siúl i gCois na hAbhna, i nGaelscoil Mhíchíl Cíosóg agus i nGaelcholáiste an Chláir, chomh maith le hAifreann na Féile san Ardeaglais.
Tá an Ghaeilge, an chruthaitheacht agus an rannpháirtíocht i gcroílár na féile. Cibé acu suim sa cheol, san ealaín, sa scríbhneoireacht nó sa chaint atá ag dalta, tá deis ann páirt a ghlacadh, muinín a chothú agus taitneamh a bhaint as an teanga i gcomhluadar daoine eile.
Comórtais na Féile
Tá 21 príomhchomórtas, agus rannóga éagsúla laistigh díobh, ar chlár 2027:
-
Ealaín: comórtais ó na naíonáin go dtí an tsraith shinsearach san iar-bhunscoil, le téamaí éagsúla do gach aoisghrúpa.
-
Scríbhneoireacht chruthaitheach: comórtais aistí agus scéalta do dhaltaí bunscoile agus iar-bhunscoile.
-
Saothar liteartha digiteach: deis saothar cruthaitheach a léiriú trí mheáin ar nós PowerPoint, Book Creator, iMovie agus Stop Motion.
-
Labhairt na Gaeilge: comórtais agallaimh do dhaltaí bunscoile agus iar-bhunscoile.
-
Aithriseoireacht aonair: deis píosa filíochta nó próis a chur i láthair.
-
Agallaimh bheirte: comórtais do dhaltaí bunscoile.
-
Scéalaíocht: deis seanscéal nó scéal nua-chumtha a insint.
-
Amhránaíocht: amhránaíocht aonair agus grúpamhránaíocht ag an dá leibhéal, chomh maith le slua-amhránaíocht bhunscoile.
-
Ceol: grúpaí ceoil bunscoile agus iar-bhunscoile, agus bannaí céilí bunscoile.
-
Tráth na gceist: comórtais foirne do bhunscoileanna agus d’iar-bhunscoileanna.
Tá rannóga ar leith do Ghaelscoileanna agus do scoileanna Gaeltachta i roinnt comórtas, mar atá sonraithe sa chlár. Bronntar trófaithe, boinn agus duaiseanna de réir rialacha gach comórtais, agus tá scoláireachtaí do Scléip an tSamhraidh 2027 ar fáil do bhuaiteoirí rannóga áirithe de Labhairt na Gaeilge.
Pearsa na Féile 2027
Is mór an onóir dúinn Méabh Ní Aoláin, Rós an Chláir, a bheith mar Phearsa na Féile 2027. Táimid ag súil go mór fáilte a chur roimpi agus muid ag ceiliúradh chruthaitheacht agus éachtaí rannpháirtithe na féile.
Coiste Fhéile na hInse 2027
-
Cathaoirleach: An tSiúr Eibhlín Ní Challanáin
-
Cisteoir: Eoin Ó Ceallaigh
-
Baill an Choiste: Caitlín Ní Mhaoldomhnaigh, Daithí Ó Diollúin, Stephanie Ní Ghealbháin, Catherine Seoighe, Niamh Nic Fheorais, Sinéad Scorlóg, Ciara Ní Mheiscill, Liam Ó Clochasaigh, Leah Ní Thailtigh, Teresa Ní Riain, Dónal Ó hAiniféin agus Domhnall Ó Loingsigh.
Iontrálacha agus Eolas
Is é Dé Luain, 18 Eanáir 2027, an dáta deiridh iontrála. Glacfar le hiontrálacha ó scoileanna, ó thuismitheoirí, ó dhaoine aonair, ó chlubanna agus ó ghrúpaí. Ní ghlacfar le hiontrálacha ar lá na gcomórtas.
Tá sonraí iomlána faoi na rannóga, na téamaí, na táillí agus na rialacha, mar aon leis an bhfoirm iontrála, i gclár na féile.
Seoladh: Féile na hInse, An Clár as Gaeilge, 2 Clós na Beairice, Sráid na Beairice, Inis, Co. an Chláir, V95 CD52
Ríomhphost:
Fón: 065 686 4474, Luan go hAoine, 9.30 r.n. go 5.00 i.n.
Beidh bronnadh duaiseanna na gcomórtas ealaíne, liteartha agus digiteach ar siúl i gCois na hAbhna Dé Domhnaigh, 7 Márta 2027, ag 12.00 meán lae.
Tacaíocht an Phobail
Táimid fíorbhuíoch de na múinteoirí, na tuismitheoirí, na moltóirí, na hoibrithe deonacha agus na hionaid a chuireann fáilte roimh imeachtaí na féile. Gabhaimid buíochas freisin le pátrúin na féile: An Clár as Gaeilge Teo., Conradh na Gaeilge Inis, Foras na Gaeilge agus Jim Casey Trophies.
Le chéile, coimeádaimis Gaeilge na hInse faoi bhláth!



